今日又同大地之子去左行山。行山的地點叫做Eiðisskarð，喺首都Torshavn的東面。由於呢座山都幾高下，當年第二次世界大戰的時候，英軍喺度設左個遼望台，監視附近海域有無德軍的船隻。呢度雖然高但係都幾易行下，因為有當地人整左d階級喺度，沿途風景都好靚，來回大概只需一小時，唔計停留影相時間，都幾值得一黎。
（以下內容或令人感到心寒，慎看）本人一直上山都懷著興奮愉快的心情，但到落山的時候，大地之子突然話：「幾年前，法羅群島有單謀殺案 ，有個住喺法羅群島的塞爾維亞男人殺左佢女朋友的前男友，並將佢的頭同四肢斬晒，帶左上黎呢個山，再喺懸崖邊掉晒佢地落海。」我聽完之後打晒冷震，淨係想快d落山。
不過其實法羅群島的罪案率非常之低，近20年的謀殺案，5隻手指數得晒，所以一旦發生罪案，就會全城關注。大地之子之後又同我分享左一個轟動一時的謀殺案。係發生喺佢嫲嫲的好朋友身上。呢單謀殺案係當時300年黎第一單發生喺法羅群島的謀殺案。
1952年，黎自挪威的17歲女生阿Ann黎到法羅群島旅行，之後就愛上左呢個地方決定喺度生活。佢好快就搵到份髮型師工作。阿Ann外貌出眾，有好多人追，但無諗過就咁招致殺生之禍。喺佢22歲嗰年識左個法羅群島男朋友，但拍左拖幾個月之後就分左手，原因我唔知。但呢個男仔非常愛阿Ann，喺分左手之後仍然經常纏著佢，成日去佢屋企等佢。阿Ann對此感到非常煩厭亦同時有d驚。所以佢唔敢自己一個喺房訓，而去左室友間房訓。案法當晚，嗰個男人帶住左枝打獵的長槍去阿Ann屋企，阿Ann間房喺二樓，於是個男人帶左長梯，爬上Ann喺二樓間房，試圖從窗門入房槍殺阿Ann。但由於阿Ann去左室友間房訓，所以個男人就喺Ann間房等左成晚（我聽到呢度起晒雞皮），等Ann第二朝一入房佢就一槍殺左阿Ann 之後再吞槍自殺。呢單謀殺案到而加都不時有電視節目攞返出黎講，大地之子的嫲嫲都受過電視台訪問，佢話當晚本來Ann係去佢屋企住，但由於當晚佢去左另一個島探朋友所以Ann就無去到，佢對此都有少少自責。
大家聽完有無少少驚？不過想黎旅行的朋友真係可以放心，法羅群島的罪案率係全球最低的國家之一。記得有一次大地之子的爸爸車我地去首都，我係最後一個出門口，我問：「點鎖門架？」跟住佢阿爸話：「唔使鎖啦，呢度無賊架。」又記得有一次我喺廳睇電視，突然有個細路入左黎，我呆左，即刻同佢爸爸講。原來個細路係佢阿爸個朋友個仔。呢度的人就係咁自出自入。大家對生活現況各樣都好滿意，自然就唔會起貪念。大家一定要黎呢度感受下呢種簡單純樸的生活☺️
Search